DAMEÑGGO DESPUES DI PENTEKOSTES, SANTISIMA TRINIDAD, Dia 22 gi Mayu 2016

FINE’NA NA TINAITAI Prv 8:22-31

Un tinaitai ginen i lepblon Sinañgan siha  

Taiguini ilek-ña i Tinemtom Yu’us: “I Saina fumañagu yo’, i primirisa gi minalago’-ña, i fumo’nanaigue i famagu’on-ña desde i antigu na tiempo; desde i antigu machuda’ñaihon yo’ huyoñg, fine’na, antes di i tano’.  Anai taya’ estaba taddoñg esta yo’ mana’huyoñg, anai trabiha taya bo’bo’ hanom; antes di u fanmapo’lo i sabana siha gi sagan-ñiha, antes di i ekso’ siha, esta yo’ mana’huyoñg; anai trabiha ti mafa’titinas i tano’ yan i gualo’, antes di i primet fache’ i tano’.  “Anai ha establesi i lañget siha estaba’ yo’ guihi, anai ha na’fitme i haligen i tano’; anai ha raya para chi-ña i tasi, ya muñga na ti u fanosge ni tinago’-ña; estaba yo’ gi fi’on-ña komu fafacho’cho’, ya guahu i minagof-ña kada dia, humugagando yo’ gi me’na-ña durante este siha, humugagando yo’ gi sanhilo’ i tano’-ña; ya hu sodda’ minagof-hu gi famagu’on i taotao.”  

I Fino’ i Saina.  R. Si Yu’os Ma’ase.


 

INEPPEN I SATMO Ps 8:4-5, 6-7, 8-9  

O ASAINA, YU’US-MAMI,  GOF BONITO I NA’AN-MU GI TODU I TANO’!

Yañggen hu atan i lañget, i che’cho’ i kalulot-mu,

i pilan yan i puti’on siha ni un pega—

Hayi gue’ i taotao na para un atiende gue’,

o sino i lahen i taotao na para un adahi gue’?  INEPPE…..

Un fa’tinas gue’ didide’ ha’ takpapa’-ña ki i manañghet,

ya un na’i gue’ korona-ña gloria yan onro.  

Un na’i gue’ para u fanmanda gi hilo’ i che’cho’ i kannai-mu,

un po’lo todu i kosas siha gi papa’ i addeñg-ña.  INEPPE…..

Todu i kinilu yan buliku,

huñggan, yan  kon todu i ga’ga’ gi halom tano’,

I paluman i aire, yan i guihan i tasi,

yan todu i mannanañgu gi halom tasi.  INEPPE…..


 

SEGUNDO NA TINAITAI   Rom 5:1-5

Un tinaitai ginen i kattan San Pablo para i taotao Roma  

Pa’go sa’ esta mana’fanunas hit ginen i hineñgge, mangaige hit gi pas yan si Yu’us ginen i Saina-ta as Jesukristo.  Ginen guiya na ta risibi un chalan ginen i hineñgge para i grasia anai mangagaige hit pa’go, ya ta sañganñañaihon i ninañgga-ta para i glorian Yu’us.  Lao ti ennao ha’ — ta sañganñañaihon lokkue’ pot i pinadesi-ta!  Ta tuñgo’ ha’ na i pinadesi mafa’tinas para u machagi i minesñgon, ya i minesñgon mafa’tinas para u machagi i bittut, ya i esta monhayan machagi na bittut para ninañgga.  Ya este na ninañgga ti u na’fandisganao hit, sa’ i ginefli’e’ Yu’us esta machuda’ñaihon huyoñg gi korason-ta ginen i Espiritu Santo ni manmana’i hit.  

I Fino’ i Saina.  R. Si Yu’os Ma’ase.


 

AKLAMASION EBANGELIO Rev l:8  

 Alleluia.  UMATUNA I TATA, I LAHI-ÑA YAN I ESPIRITU SANTO: PARA SI YU’US NI GAGAIGE, NI ESTATABA, YAN PARA U FATTO.  R.  Alleluia.  


 

EBAÑGHELIO Jn 16:12-15

I Saina u gaigi giya hamyo.  R. Yan giya hagu lokkue’.

+  Un tinaitai ginen i Santo ebañghelio sigun gi tinige’ San Juan.  R. Gloria para hagu, Asaina.

Ilek-ña si Jesus ni mandisipulu-ña: Guaha mas meggai para bai sañgani hamyo, lao ti siña en siñgon pa’go.  Lao yañggen matto gue’, sa’ pot i guiya i Espiriton minagahet guiya en fanginiha para todu i minagahet.  Ti ginen guiya ha’ na maisa na para u kuentos, lao para u sañgan ayu ha’ siha i hiniñgok-ña, ya guiya siempre ha anunsia giya hamyo hafa siha para u fanmasusedi.  Yañggen ha cho’gue este pues siempre ha tuna yo’, sa’ guiya siempre ha risibi ginen guahu hafa para u anunsia giya hamyo.  Todu i guinahan i Tata iyo-ku.  Ennao mina’ hu sañgan na ayu siha i para u anunsia giya hamyo  para u chule’ ginen guahu.”  

I Ebanghelion I Saina.  R. Umatuna Hao Asaina Jesukristo.


 

SETMON

Leave a Reply

Your email address will not be published. Required fields are marked *